اعتذار لاغلى الناس

اخوانى و اخواتى الحلويييين انا حبة انى اعتذر لصديقى العزيز احمد لانة هو الى بعتلى التاج الاخير الى انا رديت علية و مش عرفة ازاى راح من بالى انى اقول كدا مع ان دة اول سؤال ...... انا اسفة جدا جدا بس انتا عارفنى كويس الزهيمر شغال معاية بدرى بدرى و عدم التركيز انتا عارف البيت و العيال و طلبتهم يقطع الخلفة و سنينها هههههه ...... سماح المرة دى خليها عليك المرة دى هو اة انتا مخليها عليك من يوم ما عرفتنى بس معلش ........ انتا الكبيييير بقى

التاج التانى بجد اسئلة جامدة جدا

انت مين بقى؟

انا نجلاء

بنوتة بسيطة جدا جدا

عندك كام سنه؟

23 سنة

هل انت متزوج ؟ وهل عندك اولاد؟

لالالالالالالالا

دراستك ايه؟

انا خريجة سياحة و فنادق

قسم سياحة

كم طولك...وما لونك

طولى 168 – لونى زى لون تراب مصر خمرى

هل تمارس عملا بشهادتك ام عمل حر وماهو ؟

هو مش بشهدتى بظبط يعنى لانى خريجة قسم سياحة مش فنادق

انا بشتغل دلوقتى فى شركة تمتلك مجموعة من الفنادق

و انا فى قطاع رقابة الجودة على الفنادق دى

جودة الخدمات الى بتقدم للنزلاء

ماهى مدة عملك اليوميه

8 ساعات

ماذا تفعل بوقت فراغك

يعنى مفيش حاجة محدد تليفزيون – نت – او بخرج

هل لديك هوايات....وهل تمارسها ؟

اينعم انا برسم و طبعا بمارس الهواية دى بس لما بكون متدايقة

سبحان الله الرسمة بتطلع تحفة لما برسم و انا متدايقة

و بحب اكتب بس انا كنت عملة اضراب لحد وقت قريب

هل تشعر برضا ربنا عنك

مممممممم السؤال دة صعب اوى انا طمعانة فى كرم ربنة و عفوة و بتمنى انى اقدر اوصل لدرجة احساسى برضاة عنى

هل تحب ؟...ومن بقلبك الان؟

اهااااااااااا بحب من زماااان مش دلوئتى

لو لم تجد من تحب ....فماذا ستفعل

هعمل اضراب ههههههه

عندما تكون فى موقف اتخاذ القرار..تخالف الجماعه.. ام تشرك معك الاخرين ؟

هو فى اغلب الامور انا صوتى من دماغى

هل تتعامل بواقعيه؟

فى الوقت الحالى جدا جدا

و دة لان حياتى مفيهاش الرومانسية الى تخلينى افكر بمشاعرى

ماهو الشيء الذى فعلته وندمت عليه طول عمرك

ممممم بص انا مؤمنة جدا بالمقولة الى بتقول

إن الله حليم ستار

هل تصارح غيرك بالحقيقه ؟ ام تقول له مايريد سماعه؟

بص لو هو حد يهمنى هقولوا راى و بدون تردد و بمنتهى الصراحة

و لو محدش يهمنى انا مش هقول راى فى حاجة غير لما يتطلب منى و هقولة بصراحة يعنى فى الحلتين بمنتهى الصراحة

صف انسان يمكن ان تحبه عمرك كله

ههههههه السؤال دة انا ممكن الخصة فى اسم الانسان الوحيد الى حبيتة

بس مش هينفع و علشان اجاوب على السؤال دة هكتب كتيييير اوى

متى يقسو قلبك ؟

لما بحس ان كرمتى اتهانت

هل يمكن ان تحب احد من المدونين؟

لالالالالا طبعا انا ارفض تماما الحب الى بيكون عن طريق الانترنت

وهل يمكن ان يكون شريك حياتك؟

ما انا قولت لالالالالالالالا

ماذا تعنى لك المرأة او الرجل؟

المرأة ..... الحنان

الرجل ..... الامان

اقولهالك بالبلدى كدا : المرأة هى الحلة و الراجل غطاها

فى زمن البحث عن الماده ..عن ماذا تبحث انت؟

عن الامان و الاستقرار و الحب

متى تعرف انك تحب؟

هههههه هحس

ماهى الشخصيه التى اثرت بحياتك

انا كل شخصية عرفتها اثرت فى حياتى و اتعلمت منها شئ

و على راسهم صديقى العزيز احمد

هل يوجد من تراه سعيدا فى الدنيا ولماذا

يعنى بتكون سعادة مؤقتة مش لمدة طويلة

ماهى درجة صراحتك

لحد دوقتى انا صريحة جدا جدا

وماهى المواقف التى يمكن ان تكذب فيها

يعنى على حسب مفيش حجات معينة

هل يتغير الحب بعد الزواج؟

بص انا لية راى فى الحكاية دى الحب اة بيتغير بعد الجواز بيكون اقوى

لانهم بيستحملوا سوى ضغوط الحياة و العيشة بتستحملة و هو تعبان و زهقان

و هو كمان بيشيلها انها وقفت جمبة فى الاوقات الصعبة راعت ظروفة

قدرت تهون علية حتى لو بحضن حنين مش شرط انها تقدر تحللة مشاكلة بس احساسة انها حسة بية و متفهماة دة بيزود الحب بينهم

فيما تفكر الان

عوزة اقوم اعمل شوية شربة نفسى فيها اوى

لو لم تعيش بمدينتك ؟؟ ؟فاى مدينه اخرى تفضلها

الاسكندرية

من اول من ياتى ببالك لتحكى له اسرارك؟

انا فى الغالب مش بتكلم اوى فى اى حجات تخصنى

بحس ان مش كل حاجة ممكن تتقال

من هو الد اعدائك؟

اعادئي يا ساتر يارب لالالالا الحمد لله انا مليش اعداء ممكن اكون فى ناس مش بستريحلهم بس مش اعداء

من هو صديق

انا اصحابى قليلين جدا يعنى على مدار عمرى الى فات دة كلة

هما 5 اصحاب بسو بحبهم كلهم

لو الدنيا كلها زيك....لمن تقول هذه العباره

بما ان انا بنوتة فانا هقول الكلمة دى للسيدة خديجة زوجة الرسول

لانها ساندتة فى بداية الرسالة و امنت بية و برسلتة

يا ريت كل زوجة تعمل زيها و تؤمن بقدرات زوجها و تشجعة و تكون سندة فى الدنيا

و تقف جمبة فى اوقات الشدة

ماذا تكره فى الحياه

الكدب و الغش و النفاق و الحر ههههه

ماذا تحب

بحب كل حاجة عادى يعنى

كيف تواجه مايضايقك وماذا تفعل عند المفاجآت

على حسب الموقف فى حجات بيكون ضرورى فيها المواجهه و فى حجات تانية الصمت فيها بيكون افضل علاج

لو معاك فلوس اكثر مما تتخيل...فماذا ستفعل بها

هعمل حاجة لله و هعمل مشروع يساعد الشباب

و هعمل مشروع خاص بية و قبل كل دة هطلع احج او اعمل عمرة انا و اى حد عاوز يطلع معاية

هل الفقر يصنع حبا؟؟

الانسان هو الى بيصنع الحب

وماذا لو وجد الحب فى زمن الفقر المادى؟

بتفرق هنا من شخص للتانى مش مشكلة لو انسان فقير حب بس المشكلة لو ان الانسان دة مستسلم للوضع الى هو فية ساعتها هيموت الحب لان البنت هتحس

ان الى بتحبة مش بيعمل حاجة علشانها و لا علشان يحسن من وضعة
ماهى اقسى صدمه تعرضت لها حتى وقتنا هذا؟

لما اكتشفت انى رجعت وحيدة تانى

كان رد فعلك؟

حالة من لانقطاع عن العالم الخارجى لمدة 3 سنين

هل تعلمت منها شىء؟

اكييييييييد اتعلملت ان الحياة من غيرناس بتحبة بجد متتعش

و ان الانسان مننا لما يلاقى ناس بجد بيحبوة ميسبش الحجات الصغيرة بتضيع منة الناس الى بيحبهم

هل انت على استعداد لتلقى صدمات اخرى؟؟

هههههه هو تقريبا انا نحست بس ربنا ميجبش صدمات تانى

كيف ترد على من لاتصدقه

لو حد قريب منى بقولة فى وشة انى مش مسدقاة و لو حد معلافهوش بعمل نفسى مسمعتهوش

اذا احببت انسان ما ...هل تصرح له بحبك

بعتبارى انا بنوتة فمستحيييييييل انا هروح اقولة انى بحبة لانى غلية اوى و مهما كنت بحبة مستحيل هرخص نفسى بالشكل دة

بس اكيد هيبان علية و الحدق يفهم بقى

ماذا تفعل لو لم يتجاوب معك؟

هنفضلة هههههه

هل تؤمن بالمثل القائل:انا احب فانا اعيش

ممكن يكون صح بس انا اعرف ناس كتير عيشين من غير حب

هو احنا ممكن نقول ان الحب بيضيف سعادة على الحياة

ماهى القضايا التى تشغل بالك؟

بجاحة البنات الى بقت زيادة اوى

مبقوش بيتكسفوا على دمهم ميعرفوش ان احلى حاجة فى البنت حيائها

هل تستطيع تحقيق كل احلامك؟

العبد فى التفكير و الرب فى التدبير

هل تمتلك طموحا...وماهو؟

اكيييييييد فى طموحات فى الوقت الحالى و هى تخص الشغل بتمنى انى انجح فية

و طموحات على المدى البعيد انى الاقى الزوج الصالح و اكون اسرة ناجحه

كيف ستحقق طموحك...ام سيبقى حلما فقط

ربنا يكرم ان شاء الله
ماهى علاقتك بالدنيا؟

علاقة تعارف

لو لك اختيار زمن تعيش به....فماهوذلك الزمن ؟ ولماذا

زمن الاميرات و الفرسان لانة زمن الراجل فية راجل و الست ست

هل يمكن ان ارا ك وانت غائب؟؟؟؟؟؟؟

طبعا اتفضلى عندى فى المدونة بتاعتى هتشوفينى

ماذا ترى فى نفسك مميزا عن الاخرين

الهطل بعيد عنك

من اذا اقترب منك ...هربت منه بعيدا؟

الشيطااااااااااان

من تقول له : قرب منى قرب ...ياقلبى يا متغرب

ههههههه مش هقولك

اهداء التاج ؟؟؟؟؟؟؟؟؟

للاسف انا الناس الى عندى تقريبا كلهم راحلهم التاج دة بس لو لاقيت حد مرحلوش هبعتهولوا من عنية

شوية بعبعة كانوا لازم يطلعوا

حسة بحاجة جواية عمالة بتشدنى علشان فى كام حاجة كدا جواية عوزة تطلع ..... بس بينى و بينكوا انا مكنتش عوزة اطلعها ...... يمكن علشان انا حسة ان الوقت الى المفروض كانت تطلع فية عدى و من زماااان ....... و يمكن لانى عرفة ان الشخصية الوحيد الى كان نفسى تعرف و تسمع الكلام دة مش هتقراة ..... بس انا قررت اقول و الى يحصل يحصل ..........

انا مش من نوعية الناس الى يحرجوا انهم يقولوا انهم حبوا قبل كدا ...... انا محبتش غير مرة واحد فى حياتى و محدش عرف يسرق قلبى غيرة هو و بس..... مرت علينا مشاكل كتييير و اختلفنا بردة كتييير و افترقنا و دة من فترة مش قليلة ...... بس انا لسة عيشة بية جواية لحد انهردة محدش ممكن يملى عينى غيرة ...... و لا حد عرف يشيلة من قلبى و ياخد مكانة ..... المهم انا مش هدوش دماغكوا بتفاصيل متهمكوش ...... انا فى حاجة كان نفسى اقولهالوا من زمان بس مجتش الفرصة او يمكن انا الى معرفتش اقولة الكلام دة و هو ادامى ......

انا عوزة اقولة " انا مؤمنة بيييك جدا و بقدراتك و عرفة ان الدنيا ملطشة معاك فى الوقت الحالى و انك حاسس بالدنيا مئفلة ادامك ..... بس سدئنى هتفرج قريب و قريب اوى اوى ان شاء الله فاكر انا قولتلك مرة اول ما عرفتك انك هتكون حاجة مهمة اوى و كبيرة اوى و انى هشوفك فى التليفزيون فى برامج جامدة جدا ..... و دة مكانش كلام وخلاص سدئنى دة عن اقتناع كامل لانى عرفاك كويس و عرفة انتا تقدر تعمل اية ....... انا مش عوزاك تستسلم للاحساس بالاحباط الى انتا حسة عوزاك تحاول مرة و اتنين و عشرة لحد ما تعمل الى انتا بتحلم بية .... انا مش هقولك انى عوزة اكون فخورة بيك لانى فعلا فخورة بيك جدا و فخورة انى عرفت و حبيت شخصية زيك ........ يمكن يكون مش مكتوبلى انى احقق حلمى بانى اكون جمبك فى كل مراحل حياتك و يكون دة مكتوب لواحدة غيرى بس انا مش هبطل ادعيلك و لا عمرى هنساك ......... بس عوزاك علشان خطرى و خاطر كل الناس الى بيحبوك عوزاك تقوى و متيئسش بكرة اكيييييييييد احسن من امبارح فى حاجة اخيرة انا عوزة اعتذرلك انى مقدرتش اقولك الكلام دة و انا معاك و بتمنى لو انك تقراء الى انا قولتهولك دة بس ازاى

دنيا الخيال

هى فتاة ليست باهرة الجمال و لكنها صاحبة ملامح رقيقة و احاسيس مرهفة ..... دائما تحلم باليوم الذى سوف تقابل فية فارس احلامها ليخطفها بحصانة الابيض الى دنيا الاحلام و السعادة .... و ظلت تحلم و تحلم حتى تحقق حلمها و التقت بة فى حفل راقص كلة اميرات و امراء ...... ظلت عيناها تبحث عنة و تدعوا الله بان يراها و فجاة ظهر هذا الفارس بزية الانيق ...... راتة يقترب و يقترب و كلما اقترب زادت دقات قلبها حتى وصل اليها و هى تكاد لا تصدق عينها ..... وقف امامها و انحنا تحية لها و قبل يدها و كانت نظراتة مليئة بالحب و الاعجاب ....... و يسألها هل انتى اميرة هذة اول مرة التقى بك ....... فردت فى خجل لا لست اميرة ......ثم تسمع صوتة الرقيق يقول لها اميرتى هل تسمحين لى بتلك الرقصة فتنظر اليه و تحرك راسها بالقبول ...... فيمد لها يدة و يكاد قلبها يتوقف من سرعة دقاتة عندما لمست يدها يدة ....... لم تشعر بشئ الا انها بين يديه و تشعر بدقات قلبة ....... كان الصمت هو سيد الموقف و لكن اعينهم لم تتوقف عن الكلام فقد انعزلوا عن العالم المحيط بهم و لم يسمعوا شئ سوى اصوات قلبهم التى كانت تعزف احلى الالحان ..... سنفونية لم يعرفها و لم يسمعها سواهم و ظلوا يرقصون و يرقصون ...... و فجاة توقفت الموسيقى ما هذا هل انتهت الرقصة بهذة السرعة .... و عندها نظروا الى من حولهم فوجدوا كل المحيطين بهم يحدقوا فيهم و يتاملوهم بصورة جعلت هذة الفتاة تخجل بشدة و يحمر وجهها الرقيق و كأن الناس كانوا يعرفون ما يدور بداخل قلبها الرقيق ...... عندها حاولت الفرار و لكنة سارع بمسك يدها حتى لا تهرب و نظر اليها و قال اميرتى هل تقبلى .............. لم يكمل الامير طلبة و السبب فى هذا صوت قادم من بعيييييييييييييد من دنيا الواقع صوت يقول نجلاء اصحى هتتاخرى على شغلك مش كل يوم هتغلبينى فى الصحيان بالطريقة دى و للاسف اتطريت انى افتح عنية على الواقع و اسيب دنيا الخيال من غير ما اعرف يا ترى الامير كان هيطلب اية و هى كانت هترد علية و تقولوا اييييييية ؟؟؟؟؟

إيناس الجميلة شكلة واجب صعب و شديد ...... هو لازم الواحد يكون صريح اوى ههههههههه

بس هو عجبنى و فكرتة حلوة

قوانينه كالتالي:

* اذكر اسم من طلب منك حل هذا الواجب.

* اذكر القوانين المتعلقة بهذا الواجب.

* تحدث عن ستة أسرار قد لا يكتشفها من يقابلك للمرة الأولى.

* حّول هذا الواجب إلى ستة مدونين، واذكر أسماءهم مع روابط مدوناتهم في موضوعك.

* اترك تعليقًا في مدونة من حّولت الواجب عليهم؛ ليعلموا عن هذا الواجب.

السؤال الاول : طبعا إناس الحلوة

السؤال التانى : تم الاجابة علية

السؤال الثالث: ممممممممم مش سهلة دى

1- الهدوء هو الانطباع الاول الى الناس بتاخدة عنى و انى منطوية بس دة علشان انا مش باخد على الناس بسرعة و بطبعتى مش اى حد اتكلم معاة بس شوية كدا و الفضايح كلها بتبان و بذات لو كانوا بننانيت حلوين

2- العببط اة العبط فى كتييييير من الناس يقولك دى شكلها عبيطة و مش فهمة حاجة فى الدنيا و انا بقى اصدة انى اظهر وش العبط و بذات فى بداية تعاملى مع ناس معرفهومش علشان ميخدوش حذرهم و يتكشفولى بدرى بدرى سوسة انا مش كدا هههههههه

3- اول انطباع بيتاخد عنى انى اليطة و طلعة فيها بس دة مش صحيح انا بس مش باخد على الناس بسرعة و مش اى حد اعرف افتحلة قلبى لانى بحب ديما اتعامل على طبيعتى و مش هعرف اعمل دة غير لما اكون مرتاحة مع الناس الى بتعامل معاهم

4- الى يقعد معاية يتخيل انى مش شيلة هم حاجة و ضربة الدنيا بالدزمة و مفيش حد فارق معاية بس دة العكس بتاعى تماما انا مشكلتى انى مخى شغال على طووووول و الناس الى قريبين منى مهمين جدا عندى و انا ديمابشبهم بعواميد البيت الاساسية ...... و اختفاء حد منهم بيتعبنى اوى اوى

5- كتييييييييير من الناس بيفتكرونى من الشخصيات الهادية او البردة و انا ابعد ما يكون عن البرود انا من النوع العصبى جدا مش برج الطور يا جدعان ازاى اكون بردة انا مش فهمة

6- فى ناس كتير بيقولولى انى معنديش قلب حيطة يعنى علشان انا جد شوية و بحكم عقلى كتيييير فى امورى الشخصية هو نص الكلام مظبوط انى بحكم عقلى فى كتير من امورى الشخصية ..... بس النص الاولانى هو الى غلط خالص انا بحاول انى اتظاهر بدة علشان انا قلبى عامل زى الجوهرة مش اى حد يعرف يوصلة و الى بيوصلة مش بيخرج منة حتى لو بعدنا عن بعض و يمكن تكون هى دى مشكلتى فى الوقت الحالى

السؤال الرابع : انا للاسف معنديش ناس كتير اعرفهم فأنا هبعت للاس الى اعرفهم الى هما :

- يوميات طالبة مقهورة

- yala qalb

-2alb a7mar

السؤال الخامس : من عيونى الاتنين جارى التعليق

ازاى تعملوا كدا فى ولادكوا

يا ريت لو الاهالى يفهموا هما بيعملوا اية فى ولادهم لما بيتحكموا فى مصايرهم ....... لما يحرموا اولادهم من الشخص الى بيختاروة شريك لحياتهم بسبب تحكماتهم فى هيفات ...... انا اعرف ناس و بذات بنات اهلهم جوزوهم لواحد غير الى هى كانت عيزاة بس لمجرد انه مقتدر و هيعيشها نفس مستواها الى هى عايشة فية و اهلة مش عرفة مين و الكلام دة ..... زمان كنت بقول دة شغل افلام و مش بيحصل فى الواقع و يعنى اية تاخد واحد هى مبتحبهوش و مش عوزاة ....... بس اكتشفت فى دنيا الواقع انة بيحصل و ان كتير من الاهل بيستغلوا سلطتهم و انهم هيغضبوا عليها و هيقاطعوها طول عمرهم و الكلام دة ...... و لو مفيش فيدة يمشوا فى الاتجاة التانى التطفييييش ما هو اى واحد هيجى مهما كان بيحبها اكيد عندوا كرامة و هيجى علية وقت مهما كان بيحبها بس مش هيدوس على كرامتوا اكتر من كدا ...... و هى تكون مقسومة نصين ما بين الى بتحبة و مقتنعة بية و بين اهلها الى هيغضبوا عليها ....... و فى النهاية نوصل سوى للنتيجة المعروفة ....... البنت تتجوز الواحد الى مبتحبوش و تعيش معاة تحت سقف بيت واحد ....... هو مش بيكون بيت بيكون سجن حتى لو كان احلى بيت فى الدنيا ....... صعب اوى اوى و بذات على البنت انها تكون مجبرة تعيش مع انسان و روحها و قلبها مع انسان تانى خالص و تجيب ولادها من راجل مش بتحبة ...... النتيجة بقى هتكون اية اولاد ضيعين لانهم ببساطة مولودين فى بيت مفيهوش اب و ام متوافقين فكريا و لا حتى طيقين بعض لو فى يوم عدى عليهم فى هدوء تلاقى ادامة 10 ايام من الخناق و الزعيق و التشنة جو يخلق اولاد يا اما يكونوا منطوين و معندهمش ثقة فى الدنيا ولا فى الناس الى حولايهم و لا عندهم حتى الاساسيات التى تاهلهم للتعامل مع العالم الخارجى تحسهم ناس زى اهل الكهف لايعرفوا ولا يفهموا حاجة فى الدنيا دى مع انهم بيكونوا وصلوا لسن معين لازم تكون بقى عندهم المقومات الى تاهلهم للتعامل مع العالم الخارجى ..... يا اما هتلاقيهم هيطلعوا صيعين طفشنين من البيت و على طول برة و طبعا ما اكثر اصدقاء السوء فى زمنا دة فبالتالى احتمال ضياعهم كبيييير اوى ......... و ممكن ناس لما تقرأ البوست دة يقولوا اية التشاؤم دة و لا الصورة مش وحشة اوى كدا ..... بس و الله العظيم انا اعرف ناس كتير كدا و فيهم قريبين منى اوى ..... و مش قدرة اوصفلكوا حالة الضياع الى هما فيها حتى بعد ما وصلوا لسن كبير المفروض انهم بقى يكونوا اتعودوا يعتمدوا على نفسهم و يحلوا مشاكلهم بنفسهم .... بس للاسف هما اعدين بيحاربوا فى حالة التوهه و انهم مش عارفين اية الصح و اية الغلط و اية الى المفروض يعملوا و اية الى ميعملهوش ....... دول بقى هم الضحاية الاساسين طلعوا جيل ضايع و تاية و لا يعتمد علية جيل مش بيدور على زوج بيدور على الاب الحنين الى مش لاقية واحد ياخد بأيدة و يعلمة من الاول خالص أ ب الدنيا و لما يلاقوا الحد دة تلاقى الاهل يعملوا مع ولادهم نفس الى اتعمل معاهم و يحاولوا يحرموهم من الشخص الوحيد الى فهمهم و كان حنين عليهم بذمتكوا مش حاجة تحزن

مقاييس اختيار شريك الحياة ... المستوى المادى

أنغــام ~ والله حلوة

اخريتها اييييييية مش عارفة

انا اسفة اوى على اللخفنة الى انا فيها دى ...... اسفة اوى على حالة اللخبطة و القلق الى انا حسة بيها و الى بحاول انها متظهرش علشان فى ناس ملهومش ذنب انهم يدخلوا المدونة عندى يكتئبوا ....... بس انا بجد حسة انى تعبانة ........ و الى تعبنى احساسى بالوحدة عندى احساس بالوحدة غرييييب حتى لو كنت وسط الناس ....... حسة جواية حزييييييييييييين ووحييييييييييد ........ كان بقالى فترة كبيرة محستش بالاحساس دة ........ بس مش عرفة ازاى حتى و انا وسط اصحابى حسة بالوحدة ......... و كان من اول الناس الى لحظت دة اقرب صحبة لية ..... لما خرجنا يوم عيد ميلادى خروجة حلوة و روحنا اماكن انا بحبها ...... و هرجنا و دحكنا ....... بس وحنا مروحين لئيتها بتقولى انبسطى فى الخروجة ....... قولتلها جدا كانت حلوة قالتلى مش عرفة لية مش حساكى مبسوطة و لاحساكى معاية اصلا ..... احساس صعب اوى لما الواحد يحس ان مبقاش فى حاجة بتبسطة فعلا مبقاش عارف يدحك دحكة من قلبة زى زمان ........... حسة انى لو استمريت بالاسلوب دة هيجرالى حاجة...... انا عرفة ان المشكلة فية مش في الناس الى حولية ....... يمكن علشان كدا معظم اصحابى مبكلمهمش الفترة دى ......... محتاجة الاول اعرف بسبب الاحساس الى غالب علية دة علشان اعرف اتعامل مع الناس الى حولية و علشان مخسرش الناس الى بحبهم ..... بس انا عندى ثقة فى ربنا كبيرة اوى انة مش هيسبنى كدا فترة طويلة و ان شاء الله هيرسينى على بر مش هيسبنى تايهه كدا

الى متى سوف اظل ابحث عنك

ابحث عنك فى كل مكان

ابحث عنك فى نظرات المحيطين بى ولكنها ليست كنظراتك

ابحث عنك فى ابتساماتهم ولكنها ليست كابتسامتك

ابحث عنك فى كلامهم و لكنة ليس ككلامك

ظللت ابحث وابحث ولكنى لا اجدك .... اشعر بوجودك قريب منى ولاكن اين انت فانا لا اراك ...... ولكنى لن ايئس سوف اظل ابحث حتى اجدك ...... و بعد بحث كثير وجدتك ...... نعم وجدتك وكانت المفاجأة لى ... حيث اننى وجدتك فى المكان الذى ظننت انك تركتة .... اتعلم اين وجدتك ....... وجدتك داخل قلبى و عقلى ووجدانى ...... حينها شعرت بسعادة كبيرة تغمرنى كالمياة التى تغمر الارض اليابسة ...... لهذا السبب كنت اشعر بك دائما قريب منى .... فقد وقف قلبى وقفة احتجاجية يرفض بشدة خروجك منة..... نعم رفض لانة يعتبرك مالكة الوحيد و يرفض وجود اى مالك جديد ..... ووجدتك داخل عقلى وعندما سئلتة عن السبب قال لى انة لم و لن يثق فى احد مثلما وثق فيك و انك السبب الاول و الرئيسى فى التغير الذى حدث لى و لن يستطيع احد ان ياخذ مكانك داخلة ...... اكتشفت ان كل شئ بداخلى يرفض و بشدة التسليم باختفائك من حياتى ....... و يتعاملون على انك لا تزال موجود ...... كل شئ بداخلى يدعو الله ان تعود الينا مرة اخرى ...... ولكنى ادعو الله فى حالة ان فراقنا هو المكتوب علينا ان يعطينى القدرة على العيش فى هذة الحياة بدونة ........و ان يهبنى القدرة على ان اتحمل احساسى بالوحدة و الخوف ......... و فى كل الحالات فانى سوف اظل احبة و احترمة ...... و اتمنى لة النجاح و التقدم و السعادة فى حياتة ........ و سوف اعيش على ذكرياتنا الجميلة و التى سوف اعتبرها السلوى الوحيد فى حياتى

صراع ما بين الظلام و النور

اشعر بالكلام بداخلى يتزاحم و يتسابق ليخرج الى النور ..... و كانة يرفض البقاء فى الظلام اكثر من ذلك ....... اشعر بالكلمات تصرج بداخلى

" تحدثى تحدثى " كفاكى صمتا فقد صمتى لسنوات طويلة

لا لا ارغب فى التحدث فأن حديثى لن يفيد فى شئ

بل سوف يتسبب فى احياء جروحى القديمة

فتكرر ما قالتة " تحدثى تحدثى " لاجلك تحدثى

لن تشعرى بالراحة التى تبحثين عنها الا اذا تحدثتى

لن تشعرى بالامان الذى تفتقدية الا اذا واجهتى مخاوفك

الى متى سوف تظلي خائفة الى متى سوف تختارى الظلام و ترفضى النور

لن استطيع

بل سوف تستطيعين .... بداخلك طاقة و عزيمة اعرفها حاولى

احاول و احاول و لكنى اشعر بتزاحم شديد فى عقلى لا اعلم ماذا اقول

رايت ذكرياتى تمر امام عينى رايت اخطائى و اوجاعى

وكانها شريط سنيما

حينها شعرت بقلبى يخفق سريعا سريعا

فقولت لها لالا اريد لن يتحمل قلبى

ان اجمع لة كل هذة الاوجاع التى

رأيتها امام عينى الان

لا تفكرى فقط تحدثى ..... اخرجى ما بداخلك و لا تخافى

انا اعلم ما بداخل قلبك و اعلم انة سوف يتحمل هذا الالم

المؤقت فى مقابل راحتة الابدية

و بالفعل وجدت شئ ما يحركنى الى الورقة و القلم .......اصدقائى القدام ووجدت نفسى اكتب و اكتب ووجدت دموعى تنهمر منى كالسيول الغزيرة..........عندها شعرت بأحساس لم اشعر بة منذ وقت طويل ........شعرت براحة شديدة و لكنها ليست كاملة لا يزال ينقصها شئ و لكنى لا زلت لا اعلمة و لكن سوف اظل ابحث عنة حتى اجدة لتكتمل راحتى

إهداء الى اغلى الناس

زى النهردة من 23 سنة انا جيت الدنيا دى ........ و فى كتير ناس كلمونى علشان يهنونى بعيد ميلادى ....... بس و انا اعدة مع نفسى حسيت انى لازم اعمل اهداء لاغلى شخصية فى حياتى " لامى " حسيت انى عوزة اقولها بحبك اوى و اسفة اوى على كل لحظة تعب او حزن او قلق اتسببت فيها ....... اسفة على كل الوقت الى ضاع من عمرى و انا مش قريبة منك ....... انا بعتبر امى ست مختلفة تبان قوية و شديدة بس هى من جواها زى اى ام فى الدنيا مبتستحملش الهوى على اولادها ........ و للاسف انا عرفت دة من قريب اوى ...... كنت كتير بقسى عليها و اقولها كلام يوجعها ........ و كتير كنت بحسسها انها مقصرة فى حقى ........ متتخيلوش اد اية انا ندمانة على كل الى كنت بعملة ....... و لما روحتلها علشان اعتذرلها ....... حتى معتبتنيش و قالتلى انتى كنت فى سن اللا كل حاجة لا ........ لاكن انتى كبرتى دلوقتى و مخك كبر و تقدرى تفهمى الامور بالطريقة الصح ........ انهردة لما رجعت من شغلها حضنتنى جامد اوى و قالتلى كل سنة و انتى طيبة ........ و اعدت تفتكر ذكراتها معاية و انا صغيرة ........ و اعدنا نتفرج على صورى و انا صغيرة و صور عيد ميلادى الاول و اد اية كانوا فرحنين بية و كانت باب السعد الى اتفتحلهم ....... بجد يا امى انتى ست رائعة و انا بحبك اوى ........ و ان شاء الله اعوضك عن الايام الى زعلتك فيها و اخليكى فخورة بية وسط الناس و تقوليلهوم دى بنوتى الصغيرة تربية ايدى ....... ربنا ميحرمنيش منك يا ست الحبايب ........ و بتمم علية رضاكى عنى يا امى

الحياه امل